इटहरी : दुर्घटनामा परी घाइते भएका नेपाल टेलिभिजन इटहरी च्यानलमा कार्यरत कर्मचारी रबिन्द्रकुमार चौधरीलाई नयन मिडिया फाउन्डेसनले दुर्घटना बिमाअन्तर्गत प्राप्त ३२ हजार २ सय ५५ रुपैयाँ हस्तान्तरण गरेको छ।
बुधबार नेपाल टेलिभिजन इटहरी च्यानलको कार्यालयमा आयोजित कार्यक्रममा फाउन्डेसनका अध्यक्ष पवन अधिकारी, निर्देशक माधव सुवेदी तथा बिमा संयोजक देवराज पुरीले संयुक्त रूपमा चौधरीलाई बिमा दाबीबापतको रकम हस्तान्तरण गरेका हुन्।
कार्यक्रममा नेपाल टेलिभिजन इटहरी च्यानलका प्रमुख वसन्त रुपाखेतीले दुर्घटनापछि प्राप्त बिमा रकमले घाइते कर्मचारीलाई आर्थिक राहत पुगेको बताए।
उनले सञ्चारकर्मीको सुरक्षालाई प्राथमिकतामा राख्दै नयन मिडिया फाउन्डेसनले निःशुल्क दुर्घटना बिमा कार्यक्रम सञ्चालन गरेको कार्यको मुक्तकण्ठले प्रशंसा गरे।
यस्ता अभियानले सञ्चार क्षेत्रमा कार्यरत सञ्चारकर्मीलाई थप सुरक्षित, उत्साहित र आत्मविश्वासी बनाउने विश्वास उनले व्यक्त गरे।
नयन मिडिया फाउन्डेसनले हरेक वर्ष आयोजना गर्दै आएको ‘कोशी एक्सिलेन्स अवार्ड’को अवसरमा सुनसरीमा क्रियाशील सञ्चारकर्मीहरूको निःशुल्क दुर्घटना बिमा गर्दै आएको छ।
फाउन्डेसनका बिमा संयोजक देवराज पुरीका अनुसार यस वर्ष सुनसरीका ३१४ जना सञ्चारकर्मीको निःशुल्क दुर्घटना बिमा गरिएको छ।
सञ्चारकर्मीको सुरक्षा र सामाजिक उत्तरदायित्वलाई केन्द्रमा राखेर सञ्चालन गरिएको यस कार्यक्रमले दुर्घटनामा परेका पत्रकार तथा सञ्चारकर्मीलाई आर्थिक राहत उपलब्ध गराउनुका साथै पत्रकारिता पेसाप्रति सुरक्षा, विश्वास र मनोबल अभिवृद्धि गर्न महत्वपूर्ण योगदान पुर्याएको फाउन्डेसनले जनाएको छ।
