इटहरीः इटहरी उपमहानगरपालिकाले फोहोरमैला व्यवस्थापन शुल्कमा मूल्य अभिवृद्धि कर (भ्याट) थपिएको भन्ने प्रचारप्रति आफ्नो गम्भीर ध्यानाकर्षण भएको जनाएको छ ।
उपमहानगरले हालसम्म फोहोर व्यवस्थापन शुल्कमा भ्याट लगाउने वा समावेश गर्ने कुनै निर्णय, सहमति वा सम्झौता नभएको स्पष्ट पारेको छ ।
नगर प्रमुख हेमकर्ण पौडेलद्वारा जारी प्रेस विज्ञप्तिअनुसार इटहरी उपमहानगरपालिका, वैकल्पिक ऊर्जा केन्द्र र वेस्ट एन्ड इन्भारो म्यानेजमेन्ट प्रालिबीच भएको त्रिपक्षीय सम्झौताअनुसार घरधुरी, उद्योग, पसल तथा अन्य व्यावसायिक प्रतिष्ठानबाट दैनिक उत्पादन हुने फोहोरमैला निजी क्षेत्रमार्फत सङ्कलन तथा व्यवस्थापन हुँदै आएको छ ।
उपमहानगरपालिकाले पछिल्लो समय फोहोर व्यवस्थापन शुल्कमा भ्याट जोडेर शुल्क वृद्धि गरिएको भन्ने विषय सामाजिक सञ्जाल र सार्वजनिक स्थानमा चर्चाको विषय बनेको उल्लेख गर्दै त्यसमा कुनै सत्यता नरहेको जनाएको छ ।
सो विज्ञप्तिमा फोहोर व्यवस्थापन शुल्कमा भ्याट समावेश गर्ने सम्बन्धमा उपमहानगरपालिका र सेवा प्रदायक कम्पनीबीच कुनै निर्णय नभएको स्पष्ट पारिएको छ ।
उपमहानगरपालिकाले हाल कायम रहेको साविककै दरअनुसार फोहोर व्यवस्थापन शुल्क तिर्न सबै नगरवासी तथा सरोकारवालालाई अनुरोध गरेको छ ।
आधिकारिक सूचना बाहेकका हल्ला र भ्रमपूर्ण प्रचारमा विश्वास नगर्न पनि नगरले आग्रह गरेको छ ।
